Pune PMC News | कंत्राटी सफाई कामगारांचे पीएफ-ग्रॅज्युएटी बुडवणाऱ्या ठेकेदारांचे पेमेंट रोखा : आयुक्त नवल किशोर राम यांना माजी नगरसेवकांचे पत्र
PMC Pune – (The Karbhari News Service) – पुणे महापालिकेच्या क्षेत्रीय कार्यालयांमार्फत राबवण्यात येणाऱ्या झाडण कामांच्या कंत्राटदारांनी कामगारांचा प्रॉव्हिडंट फंड व ग्रॅज्युएटी भरली आहे का याची पूर्ण खात्री केल्याशिवाय त्यांचे पुढील पेमेंट करू नये, अशी ठाम मागणी माजी विरोधी पक्षनेते उज्ज्वल केसकर, सुहास कुलकर्णी व माजी नगरसेवक प्रशांत बधे यांनी केली आहे. महापालिका आयुक्त नवल किशोर राम यांना पाठवलेल्या पत्रात या तिघांनी प्रशासनाचे लक्ष वेधले आहे. (Pune Municipal Corporation – PMC)
पत्रात काय म्हटले आहे?
सर्विस चार्जचा मुद्दा: झाडण कामासाठी कामगारांच्या 874 रुपये वेतनावर सहा टक्के सर्विस चार्ज कंत्राटदाराला देण्यात आला होता.
कंत्राटदाराची जबाबदारी: कायद्यानुसार कामगारांचा पीएफ व ग्रॅज्युएटी भरणे ही कंत्राटदाराची कायदेशीर जबाबदारी आहे.
मनपाची जबाबदारी: कंत्राटदाराने ही जबाबदारी पार पाडली नाही तर त्याला पुढील रक्कम देऊ नये, अशी जबाबदारी कायद्याने महापालिकेवर टाकलेली आहे.
स्पष्ट सूचना: सर्व क्षेत्रीय कार्यालयातील सहाय्यक आयुक्त आणि उपायुक्त यांच्याकडून कोणता कंत्राटदार नेमला होता, त्याच्यामार्फत किती कर्मचारी काम करत होते व त्यांचा पीएफ-ग्रॅज्युएटी भरला आहे का याचा तपशील घेतल्याशिवाय पेमेंट करू नये.
‘सर्व तपशील तातडीने द्यावा’ अशी विनंती करताना या पत्राची प्रत अतिरिक्त आयुक्त, सर्व उपायुक्त, परिमंडळ एक ते पाच व सहाय्यक आयुक्त एक ते पंधरा यांनाही पाठवण्यात आली आहे.
पुणे मनपात दरवर्षी कोट्यवधी रुपयांची झाडण कामे कंत्राटी पद्धतीने दिली जातात. मात्र अनेकदा कंत्राटदारांकडून कामगारांचे पीएफ, ईएसआय व ग्रॅज्युएटीसारखे कायदेशीर लाभ दिले जात नाहीत, अशा तक्रारी यापूर्वीही झाल्या आहेत. कामगारांच्या हक्कासाठी प्रशासनाने ‘पेमेंट करण्यापूर्वी कागदपत्र तपासा’ ही भूमिका घेतली तरच कंत्राटदारांवर वचक राहील, असे मत कामगार संघटनांचे आहे.
आयुक्त नवल किशोर राम यांनी या पत्राची दखल घेऊन सर्व क्षेत्रीय कार्यालयांना तातडीने अहवाल सादर करण्याचे आदेश दिल्यास शेकडो सफाई कामगारांना दिलासा मिळू शकतो. कंत्राटी पद्धतीतील कामगारांच्या सामाजिक सुरक्षेचा मुद्दा ऐरणीवर आल्याने मनपा प्रशासनाच्या पुढील भूमिकेकडे सर्वांचे लक्ष लागले आहे.
COMMENTS