PMC Land Acquisition | HCMTR आणि इनर रिंग रोडसाठी खासगी जागांची मोजणी २० नोव्हेंबरपर्यंत पूर्ण करा! | आयुक्तांचे निर्देश
भूसंपादन प्रक्रियेला गती देण्यासाठी महापालिका आयुक्त आणि जिल्हाधिकाऱ्यांचा आढावा; संयुक्त मोजणीची प्रलंबित कामे पूर्ण करण्याचे आदेश
Naval Kishore Ram IAS – The Karbhari News Service – पुणे शहरातील महत्त्वाकांक्षी HCMTR (High Capacity Mass Transit Route) आणि इनर रिंग रोड प्रकल्पांच्या भूसंपादन प्रक्रियेला आता गती देण्यात येणार आहे. या दोन्ही प्रकल्पांसाठी आवश्यक असलेल्या खासगी जागांची मोजणी आणि इनर रिंग रोडसाठीची संयुक्त मोजणीची प्रलंबित कार्यवाही येत्या २० नोव्हेंबर २०२६ पर्यंत पूर्ण करण्याचे निर्देश पुणे महानगरपालिका आयुक्त नवल किशोर राम आणि जिल्हाधिकारी जितेंद्र डुडी यांनी संबंधित अधिकाऱ्यांना दिले आहेत. त्यामुळे या दोन्ही महत्त्वाच्या पायाभूत सुविधा प्रकल्पांच्या भूसंपादन प्रक्रियेला वेग येण्याची शक्यता आहे. (Pune PMC News)
पुणे शहरातील वाहतूक व्यवस्था अधिक सक्षम करण्याच्या दृष्टीने HCMTR आणि इनर रिंग रोड हे महत्त्वाचे प्रकल्प मानले जातात. या प्रकल्पांच्या अंमलबजावणीसाठी आवश्यक असलेल्या जागांचे भूसंपादन वेळेत पूर्ण होणे गरजेचे आहे. या पार्श्वभूमीवर महापालिका आयुक्त नवल किशोर राम आणि जिल्हाधिकारी जितेंद्र डुडी यांनी भूसंपादन प्रक्रियेचा सविस्तर आढावा घेतला.
HCMTR साठी खासगी जागांच्या मोजणीला प्राधान्य
HCMTR प्रकल्पासाठी आवश्यक असलेल्या खासगी जागांच्या भूसंपादनाची सद्यस्थिती बैठकीत जाणून घेण्यात आली. भूसंपादनाची प्रक्रिया पुढे नेण्यासाठी संबंधित खासगी जागांची मोजणी प्राधान्याने आणि लवकरात लवकर पूर्ण करण्याच्या सूचना आयुक्तांनी दिल्या. मोजणी आणि भूसंपादन प्रक्रियेत येणाऱ्या अडचणींचा आढावा घेऊन त्यांचे तातडीने निराकरण करावे, असेही निर्देश देण्यात आले.
इनर रिंग रोडची संयुक्त मोजणी २० नोव्हेंबरपर्यंत पूर्ण करा
इनर रिंग रोड प्रकल्पाच्या अनुषंगाने सुरू असलेल्या संयुक्त मोजणीची सद्यस्थिती आणि भूसंपादन प्रक्रियेचा आढावा यावेळी घेण्यात आला. संयुक्त मोजणीची जी कामे अद्याप प्रलंबित आहेत, ती तातडीने पूर्ण करण्याचे आदेश देण्यात आले. तसेच, संयुक्त मोजणी पूर्ण झाल्यानंतर भूसंपादनाची पुढील प्रक्रिया जलदगतीने राबविण्याच्या सूचनाही देण्यात आल्या आहेत.
भूसंपादनातील अडचणी दूर करण्याचे निर्देश
दोन्ही प्रकल्पांच्या भूसंपादन प्रक्रियेत कोणत्याही कारणामुळे विलंब होऊ नये, यासाठी संबंधित विभागांनी समन्वयाने काम करावे. खासगी जागांची मोजणी आणि संयुक्त मोजणीची कार्यवाही २० नोव्हेंबरपर्यंत पूर्ण करण्यावर प्रशासनाने भर दिला आहे. त्यामुळे आता संबंधित अधिकाऱ्यांसमोर मोजणीची कामे निर्धारित वेळेत पूर्ण करण्याचे आव्हान असणार आहे.
या बैठकीला अतिरिक्त महापालिका आयुक्त पवनीत कौर, अतिरिक्त महापालिका आयुक्त ओमप्रकाश दिवटे, शहर अभियंता अनिरुद्ध पावसकर, मुख्य अभियंता (पथ) राजेश बनकर, उपायुक्त निखिल मोरे यांच्यासह संबंधित विभागांचे अधिकारी व कर्मचारी उपस्थित होते.
COMMENTS