PMC Vaikunth Crematorium | वैकुंठ, बिबवेवाडी स्मशानभूमीतील विद्युत यंत्रणेची देखभाल खासगी संस्थेकडे; ९९.५१ लाखांचा खर्च
विद्युत यंत्रणेचे संचालन आणि देखभालीची जबाबदारी खासगी संस्थेवर; स्थायी समितीची प्रस्तावाला मान्यता
PMC Standing Committee- The Karbhari News Service – पुणे महापालिकेच्या वैकुंठ आणि बिबवेवाडी स्मशानभूमीतील विद्युत यंत्रणेची देखभाल आणि संचालन आता खासगी संस्थेमार्फत केले जाणार आहे. या कामासाठी वस्तू व सेवा करासह (GST) सुमारे ९९ लाख ५१ हजार रुपयांचा खर्च अपेक्षित आहे. यासंदर्भातील प्रस्तावाला महापालिकेच्या स्थायी समितीने मान्यता दिली असल्याची माहिती समितीचे अध्यक्ष श्रीनाथ भिमाले यांनी दिली. (
पुणे महापालिकेच्या परिमंडळ क्रमांक पाचअंतर्गत येणाऱ्या वैकुंठ आणि बिबवेवाडी स्मशानभूमींमध्ये अंत्यसंस्कारासाठी दररोज नागरिक येत असतात. या ठिकाणी असलेली विद्युत यंत्रणा सुरळीत आणि अखंडितपणे कार्यरत राहणे आवश्यक आहे. विद्युत यंत्रणेत बिघाड झाल्यास नागरिकांची गैरसोय होऊ शकते. त्यामुळे या दोन्ही स्मशानभूमींमधील विद्युत सुविधांची देखभाल आणि संचालनाची जबाबदारी खासगी संस्थेकडे देण्याचा निर्णय घेण्यात आला आहे.
विद्युत यंत्रणेच्या देखभालीसाठी ९९.५१ लाखांचा खर्च
या कामासाठी महापालिकेच्या विद्युत विभागाने ९५ लाख ४७ हजार ७७४ रुपयांचे अंदाजपत्रक तयार केले होते. मुख्य अभियंत्यांनी १८ मे २०२६ रोजी या अंदाजपत्रकाला मान्यता दिली. त्यानंतर महापालिका आयुक्तांनी २० मे २०२६ रोजी निविदा प्रक्रिया राबविण्यास मंजुरी दिली होती.
या कामासाठी महापालिकेकडून निविदा मागविण्यात आल्या. निविदांमधील कागदपत्रांची छाननी केल्यानंतर दोन संस्थांचे प्रस्ताव पात्र ठरले. त्यानंतर २ जुलै २०२६ रोजी या संस्थांच्या आर्थिक निविदा उघडण्यात आल्या. आता या कामासाठी जीएसटीसह सुमारे ९९ लाख ५१ हजार रुपयांचा खर्च अपेक्षित असून, स्थायी समितीने प्रस्तावाला मान्यता दिली आहे.
मनुष्यबळासह दैनंदिन संचालनाची जबाबदारी
खासगी संस्थेकडे विद्युत यंत्रणेची नियमित देखभाल, आवश्यक दुरुस्ती आणि संचालनाची जबाबदारी असणार आहे. याशिवाय या कामासाठी आवश्यक मनुष्यबळ उपलब्ध करून देणे आणि दोन्ही स्मशानभूमींमधील विद्युत सुविधांचे दैनंदिन कामकाज सुरळीत ठेवणेही संबंधित संस्थेला बंधनकारक असणार आहे.
स्मशानभूमीतील विद्युत सुविधा ही अत्यावश्यक सेवा असल्याने देखभाल आणि दुरुस्तीच्या कामात कोणताही खंड पडू नये, यासाठी खासगी संस्थेची नियुक्ती करण्याचे महापालिकेचे नियोजन आहे.
COMMENTS