Pune Municipal Corporation Bonus | पुणे महापालिका अधिकारी-कर्मचाऱ्यांना ८.३३ टक्के सानुग्रह अनुदानासह २७ हजारांचे बक्षीस; वितरणासाठी परिपत्रक जारी
| २०२५-२६ या आर्थिक वर्षासाठी सानुग्रह अनुदान मंजूर; किमान १८० दिवस कामावर उपस्थितीची अट | ३ नोव्हेंबरपर्यंत बिले तपासण्याचे आदेश
PMC Diwali Bonus 2026 – The Karbhari News Service – पुणे महानगरपालिकेतील अधिकारी आणि कर्मचाऱ्यांसाठी दिवाळीच्या पार्श्वभूमीवर महत्त्वाचा निर्णय घेण्यात आला आहे. महापालिकेच्या अधिकारी व सेवकांना सन २०२५-२६ या आर्थिक वर्षासाठी ८.३३ टक्के सानुग्रह अनुदानासह २७ हजार रुपये जादा बक्षीस देण्यास मान्यता देण्यात आली आहे. या अनुदानाच्या वितरणाबाबत महापालिकेच्या मुख्य लेखा व वित्त विभागाने ३० ऑक्टोबर रोजी कार्यालयीन परिपत्रक जारी केले आहे. त्यानुसार पात्र अधिकारी आणि कर्मचाऱ्यांना त्यांच्या उपस्थितीच्या प्रमाणात सानुग्रह अनुदान अदा करण्यात येणार आहे. विशेष म्हणजे, या प्रक्रियेसाठी सानुग्रह अनुदानाची बिले ३ नोव्हेंबर २०२६ पर्यंत ऑडिट विभागाकडून तपासून घेण्याचे निर्देश देण्यात आले आहेत. (Pune PMC News)
पुणे महापालिकेच्या सह महापालिका आयुक्त तथा मुख्य लेखा व वित्त अधिकारी उल्का कळसकर यांनी हे परिपत्रक जारी केले आहे. यासाठी स्थायी समितीचा ठराव क्रमांक १४४९, दिनांक ३० ऑक्टोबर २०२६ आणि महापालिका आयुक्तांचा ठराव क्रमांक ६/५९१, दिनांक ३० ऑक्टोबर २०२६ यानुसार मान्यता देण्यात आली आहे.
| कोणाला मिळणार सानुग्रह अनुदान?
महापालिकेतील सर्व अधिकारी आणि कर्मचारी सेवक, रोजंदारी कामगार, माध्यमिक व तांत्रिक शिक्षण विभागातील शिक्षक आणि शिक्षकेतर सेवक तसेच प्राथमिक शिक्षण विभागातील शिक्षक, शिक्षकेतर सेवक, बालवाडी शिक्षिका आणि सेविका यांना या निर्णयाचा लाभ मिळणार आहे.
संबंधित सेवकांच्या सन २०२५-२६ या वर्षातील मूळ वेतन आणि महागाई भत्ता यावर ८.३३ टक्के दराने सानुग्रह अनुदान देण्यात येणार आहे. त्यासोबत २७ हजार रुपये जादा बक्षीस देण्यासही मान्यता देण्यात आली आहे. मात्र, ही रक्कम संबंधित सेवकांच्या प्रत्यक्ष कामावरील उपस्थितीच्या प्रमाणात अदा केली जाणार आहे.
| किमान १८० दिवस उपस्थिती आवश्यक
सानुग्रह अनुदान मिळण्यासाठी संबंधित आर्थिक वर्षात किमान १८० दिवस प्रत्यक्ष कामावर उपस्थित असणे आवश्यक आहे. घाणभत्ता देय असणाऱ्या सेवकांनाही ही अट लागू राहणार आहे. प्रसूती रजा, तत्सम रजा किंवा वैद्यकीय रजा यांचा उपस्थितीच्या दिवसांमध्ये अपवाद करण्यात येणार नाही.
मात्र, कामावर असताना आणि काम करताना झालेल्या अपघातामुळे एखाद्या सेवकाला विशेष वैद्यकीय रजा घ्यावी लागली असल्यास, महापालिकेच्या सेवा नियमांतील मर्यादेनुसार अशी रजा उपस्थिती म्हणून ग्राह्य धरण्यात येणार आहे.
किमान एक वर्ष शासकीय सेवा झालेल्या सेवकांच्या बाबतीतही संबंधित आर्थिक वर्षातील १८० दिवसांची प्रत्यक्ष उपस्थिती विचारात घेऊनच अनुदान अदा केले जाणार आहे.
| नव्याने नियुक्त झालेल्या कर्मचाऱ्यांनाही लाभ
पुणे महापालिकेत नवीन नियुक्ती होऊन रुजू झालेल्या आणि सानुग्रह अनुदान देण्याच्या महिन्यात एक वर्षाची सेवा पूर्ण झालेल्या सेवकांनाही या अनुदानासाठी पात्र ठरविण्यात आले आहे. मात्र, त्यांनाही संबंधित वर्षात किमान १८० दिवस प्रत्यक्ष उपस्थितीची अट लागू राहणार आहे.
अशा कर्मचाऱ्यांना त्यांच्या प्रत्यक्ष हजर दिवसांचा विचार करून प्रमाणशीर पद्धतीने (Pro Rata) सानुग्रह अनुदान दिले जाणार आहे.
| प्राथमिक शिक्षण विभागातील शिक्षण सेवकांना अतिरिक्त रक्कम
प्राथमिक शिक्षण विभागातील शिक्षण सेवकांसाठी स्वतंत्र तरतूद करण्यात आली आहे. त्यांना त्यांच्या वेतनाच्या ८.३३ टक्के सानुग्रह अनुदानासह १० हजार रुपये अतिरिक्त रक्कम अदा करण्यात येणार आहे.
| रोजंदारी कामगारांसाठी स्वतंत्र गणना
रोजंदारी कामगारांनाही या सानुग्रह अनुदानाचा लाभ मिळणार आहे. मात्र, त्यासाठी २०२५-२६ या आर्थिक वर्षात किमान १८० दिवस काम केलेले असणे आवश्यक आहे. त्यांना सेवाकालावधीनुसार आणि प्रत्यक्ष हजर दिवसांच्या प्रमाणात रक्कम देण्यात येणार आहे.
रोजंदारीसाठी २६ दिवसांचा महिना गृहीत धरून सानुग्रह अनुदानातील अतिरिक्त रकमेचा दैनिक दर निश्चित करण्यासाठी ३१३ दिवसांनी भागाकार करण्याची तरतूद परिशिष्टात करण्यात आली आहे. तसेच खाडे रोजंदारी कामगारांसाठीही उपस्थितीच्या प्रमाणात रक्कम देण्यात येणार असून, त्यांचा दैनिक दर काढताना ३१३ दिवसांचा आधार घेण्याचे नमूद करण्यात आले आहे.
| निलंबित आणि बडतर्फ कर्मचाऱ्यांबाबत महत्त्वाची अट
सानुग्रह अनुदानाची रक्कम बँक खात्यात जमा होण्यापूर्वी ज्या अधिकारी किंवा सेवकांना बडतर्फ करण्यात आले असेल, त्यांना या अनुदानाचा लाभ दिला जाणार नाही.
तसेच खातेनिहाय चौकशी किंवा अन्य कारणांमुळे सेवेतून निलंबित करण्यात आलेल्या अधिकारी व सेवकांना चौकशीची प्रक्रिया आणि संबंधित कार्यवाही पूर्ण होऊन अंतिम निर्णय जाहीर होईपर्यंत सानुग्रह अनुदानाची रक्कम दिली जाणार नाही.
दुसरीकडे, २०२५-२६ या आर्थिक वर्षात महापालिकेत सेवा केलेल्या; मात्र सेवानिवृत्ती, वैद्यकीयदृष्ट्या अपात्र ठरणे किंवा मृत्यू यामुळे ज्यांची सेवा संपुष्टात आली आहे, अशा अधिकारी व सेवकांना त्यांच्या सेवाकालावधीनुसार आणि उपस्थितीच्या प्रमाणात सानुग्रह अनुदान देण्यात येणार आहे.
| संघटना निधीची कपात होणार
सानुग्रह अनुदान आणि अतिरिक्त बक्षीस यांच्या रकमेतून सेवकांच्या वर्गवारीनुसार संघटना निधीची कपात करण्यात येणार आहे. यासाठी पुढीलप्रमाणे रक्कम निश्चित करण्यात आली आहे.
– वर्ग १ मधील अधिकारी – ७०० रुपये
– वर्ग २ मधील अधिकारी – ७०० रुपये
– वर्ग ३ मधील अधिकारी व सेवक – ५०० रुपये
– वर्ग ४ मधील सेवक व कर्मचारी – ४०० रुपये
याशिवाय, सानुग्रह अनुदानातून आयकर तसेच भविष्य निर्वाह निधीची वर्गणी कपात करावयाची असल्यास संबंधित सेवकांनी बिल लेखनिकांना त्याबाबत पूर्वसूचना देणे आवश्यक आहे. त्यासाठी संगणक प्रणालीमध्ये आवश्यक सुविधा उपलब्ध करून देण्यात आली आहे.
| ३ नोव्हेंबरपर्यंत बिले तपासण्याचे आदेश
सर्व पात्र सेवकांना सानुग्रह अनुदान अदा करण्यासाठी संबंधित बिले ३ नोव्हेंबर २०२६ अखेरपर्यंत ऑडिट विभागाकडून तपासून घेण्याचे निर्देश देण्यात आले आहेत. सानुग्रह अनुदानाची रक्कम थेट बँक खात्यात जमा करण्यात येणार असल्याने आवश्यक संगणक प्रणालीचे व्हर्जन सांख्यिकी व संगणक कार्यालयाकडून तातडीने प्राप्त करून घेण्यासही सांगण्यात आले आहे.
सप्टेंबर २०२६ महिन्याचे वेतन ज्या खात्याकडून संबंधित सेवकाला अदा करण्यात आले आहे, त्याच खात्यामार्फत सानुग्रह अनुदानाची रक्कम दिली जाणार आहे.
| आर्थिक वर्षानंतर अनुदानाची मागणी स्वीकारली जाणार नाही
सानुग्रह अनुदानाबाबत परिपत्रकात एक महत्त्वाची अट घालण्यात आली आहे. आर्थिक वर्ष संपल्यानंतरही त्या वर्षाचे सानुग्रह अनुदान मिळावे, यासाठी वारंवार मागण्या करण्यात येत असल्याचे प्रशासनाच्या निदर्शनास आले आहे. त्यामुळे सानुग्रह अनुदान केवळ संबंधित आर्थिक वर्षातच देणे अनुज्ञेय राहील. त्यानंतर याबाबत करण्यात येणारी कोणतीही मागणी विचारात घेतली जाणार नसल्याचे स्पष्ट करण्यात आले आहे.
या निर्णयामुळे पुणे महापालिकेतील पात्र अधिकारी, कर्मचारी, शिक्षक आणि रोजंदारी कामगारांना सानुग्रह अनुदानाचा लाभ मिळण्याचा मार्ग मोकळा झाला आहे. आता प्रशासनाकडून बिले तपासणी आणि संगणकीय प्रक्रियेची पूर्तता करून प्रत्यक्ष रक्कम कर्मचाऱ्यांच्या बँक खात्यात जमा करण्याची कार्यवाही केली जाणार आहे.
COMMENTS