Naval Kishore Ram IAS | गणेश मंडळ व नागरिकांना महापालिका आयुक्त नवल किशोर राम यांचे “जाहीर आवाहन”
Ganeshotsav Pune – (The Karbhari News Service) – पुणे शहरातील या वर्षीचा गणेशोत्स २७ ऑगस्ट ते ०६ सप्टेंबर या कालावधीत साजरा होणार आहे. त्या अनुषंगाने गणेशमंडळांनी व नागरिकांनी यावर्षीचे गणेशोत्सव व नवरात्रोत्सव साजरा करताना पुणे महापालिकेने केलेल्या सूचनांचे व अटी शर्तीचे पालन करणेबाबत सर्व संबंधितांना महापालिका आयुक्त नवल किशोर राम यांच्या तर्फे “जाहीर आवाहन” करण्यात आले आहे. (Pune News)
सन २०२२ पासून पुढील ५ वर्षाच्या कालावधीकरिता सन २०१९ चे सालामध्ये देण्यात आलेल्या उत्सव मंडप, स्वागत कमानी व रनिंग मंडप इत्यादींच्या परवानग्या ग्राह्य धरण्यात येणार आहे. अशा परवानाधारकांना नव्याने परवानगी घेण्याची आवश्यकता राहणार नाही. या परवानग्यांना पुणे मनपामार्फत कोणतेही परवाना शुल्क आकारले जाणार नाही.
पुणे शहरात नव्याने समाविष्ट झालेल्या गावांमधील गणेश मंडळांना स्थानिक पोलीस विभाग / वाहतूक पोलीस विभाग तसेच मनपा संबंधित क्षेत्रिय कार्यालय यांचेमार्फत सन २०१९ सालची परवानगी घेणेकरिता वापरण्यात आलेल्या कार्यपद्धतीचा अवलंब करून रितसर नव्याने या वर्षांकरिता सर्व परवानग्या घ्याव्या लागणार असून, त्यांना देखील कोणतेही परवाना शुल्क आकारले जाणार नाही.
पुणे शहरात ज्या मंडळांना नव्याने गणेशोत्सव साजरा करावयाचा असेल अथवा पूर्वीच्या सन २०१९ मधील परवानगीची जागा प्रकल्प बाधित झाल्याने किंवा इतर कारणास्तव बदल करणे आवश्यक असल्यास नवीन जागेवरील सर्व परवानग्या सन २०१९ सालच्या प्रचलित कार्यपद्धतीचा अवलंब करून नव्याने घ्याव्या लागतील.
वरील दोन मुद्यांमध्ये नमूद केलेनुसार ज्या मंडळांना नव्याने उत्सव मंडप, स्वागत कमानी व रनिंग मंडप इत्यादींच्या परवानग्या घ्याव्या लागणार आहेत अशा मंडळांकरिता संबंधित पोलीस स्टेशनमध्ये पुणे मनपा व पुणे शहर पोलीस विभाग यांचे सयुंक्त उपक्रमाद्वारे “एक खिडकी योजना राबवून आवश्यक सर्व परवानग्या सदर ठिकाणी देण्याची कार्यवाही करण्यात येईल.
उच्च न्यायालयाने जनहित याचिका क्र. १७३/२०१० मध्ये मंडप उभारणीकरिता दिलेल्या सर्व आदेशांचे पालन करावे. मंडपाची उंची ४० फुटापेक्षा जास्त नसावी ४० फुटापेक्षा जास्तीचा मंडप उभारायाचा असल्यास त्याकामी मंडळांनी सुरक्षेच्या दृष्टीकोनातून अधिकृत स्थापत्य अभियंता यांचे स्टॅबेलिटी सर्टिफिकेट जोडणे आवश्यक राहील.
मंडप व स्वागत कमानी उभारताना आपत्कालीन गाड्या उदा अग्रिशमन रुग्णवाहिका तसेच प्रवासी बसेस इ. रहदारीकरिता लगतचे रस्ते मोकळे ठेवणे तसेच कमानींची उंची रस्त्याच्या पृष्ठभागापासून १८ फुटांपेक्षा जास्त राहील याची दक्षता घ्यावी. आवश्यकतेनुसार स्वयंसेवक/ सुरक्षा रक्षक नेमावेत.
स्थापना करण्यात येणाऱ्या गणेशमूर्ती ह्या प्राधान्याने पर्यावरणपूरक शाडू मातीच्याच वापराव्यात संस्था/संघटना / मंडळे अथवा वैयक्तिक नागरिक यांनी पर्यावरणपुरक उपक्रमांना योगदान देवून याकामी महाराष्ट्र शासनाच्या पर्यावरण विभागाकडून वेळोवेळी देण्यात आलेल्या प्रदुषण नियंत्रण विषयक कायद्याची / मार्गदर्शक सूचनांची अंमलबजावणी करावी. तसेच मनपाच्या अग्निशमन विभागाकडून देण्यात येणाऱ्या सर्व सूचनांचे पालन करावे.
या वर्षीचा गणेशोत्सव साजरा करणेबाबत महाराष्ट्र शासन स्थानिक प्रशासन व पोलीस विभाग यांचेमार्फत वेळोवेळी कळविलेनुसार / ठरविलेनुसार सर्व नियम व अटी / शर्तीचे पालन करणे सर्व गणेश मंडळांना बंधनकारक करण्यात येईल.
उत्सव संपल्यानंतर संबंधितांनी ३ दिवसांचे आत स्वखर्चाने सदरचे मंडप / स्टेज / रनिंग मंडप/कमान तसेचर स्त्यावरील देखावे, विटांमधील बांधकामे, देखाव्यातील मुर्ती व अन्य साहित्य रस्त्यांवरून ताबडतोब हटवून घेणे तसेच घेतलेले रस्त्यावरील खड्डे स्वखर्चाने सिमेंट कॉन्क्रेटमध्ये बुजवून मनपाची जागा सुस्थितीत करणे बंधनकारक राहील.
ध्वनीप्रदुषणाबाबत शासकीय नियमांचे तंतोतंत पालन करावे गणेशोत्सव कालावधीत याकामी नागरिकांच्या तक्रारी येणार नाहीत याची संपूर्ण दक्षता घेणे अशा स्वरूपाच्या येणाऱ्या नागरिकांच्या तक्रारींचे निवारण करणेकरिता मनपा व पोलीस प्रशासन स्तरावर तक्रार निवारण यंत्रणा कार्यान्वित करण्यात आलेली आहे ..
परवाना दिलेल्या जागेची पुणे महानगरपालिकेस जरूरी भासल्यास अथवा त्या जागेबाबतचा वाद / विवाद निर्माण झाल्यास देण्यात आलेला अधिकृत मंडप / कमान परवाना उत्सव सुरु होण्याच्या पूर्वी रद्द करण्याचा मनपास हक्क राहील.
उच्च न्यायालयाने जनहित याचिका क्र. १७३/२०१० मध्ये दिलेल्या सर्व आदेशांचे व त्या अनुषंगाने शासनाने परिपत्रकाद्वारे कळविलेल्या सर्व सूचनांचे सर्व मंडळांनी पालन करणे बंधनकारक राहील. तसेच सर्व गणेश मंडळांनी सन २०१९ सालच्या अथवा नव्याने घेतलेल्या सर्व परवान्यांच्या प्रती मंडप/ कमानीच्या दर्शनी भागात प्लास्टिक कोटिंगमध्ये सहजपणे दिसतील अशा ठिकाणी लावाव्यात.
स्थानिक रहिवाश्यांना / पदपथांवरील पादचाऱ्यांना / वाह्नांना अडथळा होणार नाही, ध्वनीप्रदुषणाचा त्रास होणार नाही याची मंडळानी दक्षता घ्यावी. उत्सव कालावधीत नागरिकांना तक्रारी करणेकरिता खालील माध्यमाद्वारे तक्रार नोंदविण्याची सुविधा पुणे महानगरपालिकेतर्फे उपलब्ध केली आहे.
संकेतस्थळ :- http://complaint.punecorporation.org, टोल फ्री नंबर 1800 1030222-
मोबाईल अॅप – PUNE Connect (PMC Care), Whatsapp NO 9689900002,
•
मुख्य अतिक्रमण कार्यालय संपर्क क्र.: ०२०-२५५०१३९८,
•
.
ई-मेल – feedback@punecorporation.org, encroachment1@punecorporation.org
वरील माध्यमाद्वारे येणाऱ्या तक्रारींचे निराकरण सर्व क्षेत्रिय कार्यालय स्तरावर तसेच सर्व स्थानिक पोलीस स्टेशनंबर करण्यात येईल. सण / उत्सवांचे कालावधीत कोणत्याही अडचणींबाबत गणेश मंडळ / नागरीकांनी संबंधित मनपा क्षेत्रिय कार्यालयांशी संपर्क साधावा. अनधिकृत विक्रेत्यांवर नियमानुसार कारवाई केली जाईल. गणेशमूर्ती विक्री स्टॉलकरिता सर्व क्षेत्रिय कार्यालय हद्दीतील मनपा शाळांची पटांगणे, मनपा मोकळ्या जागा उपलब्ध करून त्या ठिकाणी परवानगी देणेची कार्यवाही मनपाच्या मालमत्ता व व्यवस्थापन विभागाकडून करण्यात आली आहे.
COMMENTS