पदोन्नतीने उपायुक्त झालेल्या अधिकाऱ्यावर सोपवली ‘ही’ जबाबदारी
| महापालिका आयुक्तांचे आदेश
पुणे | महापालिकेच्या सहायक आयुक्त या पदावरून उपायुक्त या पदावर किशोरी शिंदे आणि युनूस पठाण यांची नियुक्ती करण्यात आली आहे. दरम्यान महापालिका आयुक्तांनी त्यांच्यावर विभिन्न विभागाची जबाबदारी देखील सोपवली आहे. त्यानुसार उपायुक्त किशोरी शिंदे यांच्याकडे परिमंडळ क्रमांक 1 ची जबाबदारी देण्यात आली आहे. तर युनूस पठाण यांच्याकडे झोपडपट्टी निर्मूलन व पुनर्वसन या विभागाची जबाबदारी देण्यात आली आहे.
पुणे महापालिकेच्या तीन सहायक आयुक्त तथा क्षेत्रीय अधिकाऱ्यांना पदोन्नतीच्या माध्यमातून उपायुक्त या पदावर बढती देण्यात आली आहे. यामध्ये युनूस पठाण, किशोरी शिंदे आणि आशिष महाडदळकर यांचा समावेश आहे. याबाबतच्या प्रस्तावाला नुकतीच मान्यता देण्यात आली आहे. दरम्यान यातील दोघांना विविध विभागाची जबाबदारी देण्यात आली आहे. तर संजय गावडे निवृत झाल्यानंतर आशिष महाडदळकर यांना जबाबदारी दिली जाणार आहे. महापालिका आयुक्त विक्रम कुमार यांनी याबाबतचे आदेश जारी केले आहेत.
