टॅक्स मधून महापालिकेला 1001 कोटींचे उत्पन्न! – 1000 कोटींचा टप्पा केला पार – कर संकलन प्रमुख विलास कानडे यांची माहिती

– 1000 कोटींचा टप्पा केला पार

– कर संकलन प्रमुख विलास कानडे यांची माहिती

पुणे. प्रॉपर्टी टॅक्स हा महापालिकेचा उत्पन्नाचा महत्वाचा स्रोत आहे. टॅक्स च्या उत्पन्नातून महापालिकेच्या तिजोरीत भर पडत आहे. टॅक्स ने नुकताच 1 हजार कोटींचा टप्पा पार केला आहे. या आर्थिक वर्षात पालिकेला टॅक्स मधून 27 ऑगस्ट पर्यंत 1001 कोटींचे उत्पन्न मिळाले आहे. अशी माहिती कर संकलन आणि कर आकारणी विभागाचे प्रमुख विलास कानडे यांनी दिली.

– 30 जून पर्यंत होती 15% सवलत

महापालिकेचा प्रॉपर्टी टॅक्स हा उत्पन्नाचा महत्वाचा स्रोत मानला जातो. मागील वर्षी या विभागाने महापालिकेला 1700 कोटींचे उत्पन्न मिळवून दिले होते. चालू आर्थिक वर्षात देखील पहिल्या 5 महिन्यात महापालिकेला टॅक्स मधून 1001 कोटींचे उत्पन्न मिळाले आहे. जास्तीत जास्त लोकांनी टॅक्स भरावा या हेतूने महापालिकेच्या वतीने पहिल्या दोन महिन्यात कर भरणारांसाठी 15% सवलत दिली जाते. याबाबत कानडे म्हणाले,  यावर्षी ही मुदत वाढवून 30 जून केली होती. याचा फायदा शहरातील 4 लाख 4 हजार 275 लोकांनी घेतला. यातून महापालिकेला 303 कोटींचे उत्पन्न मिळाले. तर सवलतीची रक्कम 50 कोटी होती. त्याशिवाय आपल्या सोसायटीत गांडूळ खत प्रकल्प, छोटे कचरा प्रकल्प व बायोगॅस प्रकल्प करणाऱ्या नागरिकांना करात 5 ते 10% सवलत दिली जाते. 1 एप्रिल ते 30 जून या कालावधीत याचा 1 लाख 42 हजार 238 लोकांनी फायदा घेतला. यातून महापालिकेला 497 कोटींचे उत्पन्न मिळाले. असे ही कानडे यांनी सांगितले.

– मागच्या वर्षी मिळाले होते 790 कोटी

कानडे यांनी सांगितले की, महापालिकेला मागच्या वर्षी 1 एप्रिल ते 27 ऑगस्ट या कालावधीत 790 कोटींचे उत्पन्न मिळाले होते. सुमारे 5 लाख 54 हजार 491 नागरिकांनी कर भरला होता. तर या वर्षी याच कालावधीत सुमारे 6 लाख 26 हजार 72 नागरिकांनी 1001 कोटींचा कर भरला. महापालिकेला यामुळे दिलासा मिळाला आहे.