Pune Sex Ratio | सांस्कृतिक राजधानीत मुलींच्या जन्माच्या प्रमाणात होत चालली घसरण!
| 2022 साली 1 हजार मुलांमागे फक्त 910 मुली, तर चालू वर्षात फक्त 863 मुली
Pune Sex Ratio | (Author – Ganesh Mule) | एक हजार मुलांच्या जन्मामागे मुलींचे प्रमाण राज्यात सुधारले असले, तरी पुणे शहर (Pune City) मुलींच्या जन्माचे स्वागत करण्यात मागेच असल्याची धक्कादायक माहिती पुढे आली आहे. पुढारलेल्या पुण्यात ही स्थिती व्हावी, याबाबत आश्चर्य व्यक्त केले जात आहे. महापालिका आरोग्य विभागाच्या (PMC Health Department) माहितीनुसार पुणे शहरात मुलींचे जन्माचे प्रमाण 2022 साली हे 910 होते. 2020 साली हे प्रमाण 946 होते. तर चालू वर्षात हे प्रमाण 863 इतकेच आहे. मागील काही वर्षात महापालिकेने चांगले काम करत हे प्रमाण 879 वरून 946 पर्यंत आणले होते. मात्र आता पुणे शहरातील मुलींच्या जन्माच्या प्रमाणात चांगलीच घसरण होत चालली आहे. यामुळे आता राज्य सरकारने देखील पुणे महापालिकेला फटकारले आहे. (Pune Sex Ratio)
: जनजागृतीत आणि कारवाई करण्यात महापालिका कमी पडली
एक हजार मुलांच्या जन्मामागेच मुलींच्या जन्माचे प्रमाण काढण्यात येते. पुणे महापालिकेकडून (PMC Pune) अथवा कोणत्याही शहर, जिल्ह्यातून मुलींच्या जन्माची आकडेवारी उपलब्ध झाल्यास त्यावरून लिंग गुणोत्तर निश्चित केले जाते. जन्म विभागाकडे दैनंदिन मुला मुलींच्या जन्माची नोंदणी केली जाते. त्यातून संकलित माहितीच्या आधारे हे प्रमाण काढले जाते. लिंग गुणोत्तराच्या बाबतीत पुणे शहर आणि महापालिका राज्यात वरच्या स्थानावर होती. याबाबत महापालिकेचे राज्य सरकार कडून कौतुक देखील केले जायचे. महापालिकेकडून वेगवेगळ्या उपाय योजना राबवून आणि जनजागृती करून हे प्रमाण वाढवले गेले होते. मात्र 2021 आणि 2022 सालात हे प्रमाण चांगलेच घसरले आहे. मुलींचे स्वागत करण्यात पुढारलेले पुणे उणे का असा प्रश्न आता विचारला जाऊ लागला आहे. दरम्यान महापालिका जनजागृती करण्यात आणि लिंग तपासणाऱ्या रुग्णालयावर कारवाई करण्यात कमी पडली असल्याचे सांगण्यात येत आहे. (Pune Municipal Corporation Health Department)
: 2020 ला सेक्स रेशो 946
दरम्यान, ‘ 2010 साली पुणे शहरातील मुलींच्या जन्माचे प्रमाण 879 होते. 2011 मध्ये मुलींच्या जन्माचे प्रमाण 884 एवढे होते. 2012 व 2013 मध्ये अनुक्रमे 934 व 933 एवढे प्रमाण होते. 2014 मध्ये त्यात थोडीशी वाढ होऊन ते 937 पर्यंत गेले, तर 2015 मध्ये हे प्रमाण घसरून 925 पर्यंत खाली आले होते. त्यानंतर 2019 ला 922 तर 2020 ला हे प्रमाण 946 पर्यंत आले होते. मात्र 2021 मध्ये यात खूपच घसरण झाली. 1000 मुलांच्या मागे मुलींचे प्रमाण फक्त 900 असे होते. तर 2022 साली यात थोडीशी सुधारणा होऊन हे प्रमाण 910 इतके झाले. त्यानंतर आता 2023 सालात देखील संख्या कमीच असल्याचे दिसून येत आहे. मे पर्यंतच्या आकडेवारी वरून हे प्रमाण 863 इतके असल्याचे दिसून आले आहे. असे पुणे महापालिकेच्या आरोग्य विभागाच्या अधिकाऱ्यांनी सांगितले. (Pune Municipal Corporation News)
: लिंग गुणोत्तर (sex Ratio) प्रमाण
वर्ष रेशो
2010 879
2011 884
2012 934
2013 933
2014 937
2019 922
2020. 946
2021. 900
2022. 910
2023. 863
(मे पर्यंत)
—
News Title | Pune Sex Ratio | Declining birth rate of girls in the cultural capital!| Only 910 girls per 1 thousand boys in 2022, only 863 girls in current year
