Pune Rain News | शहरात पाणी साठणाऱ्या भागांसाठी ॲक्शन प्लॅन तयार करून तात्काळ व दीर्घकालीन उपाययोजना राबवणार — गणेश बिडकर
| सुट्टीच्या दिवशीही महापालिका आपत्ती व्यवस्थापन कक्ष कार्यरत; सभागृह नेते गणेश बिडकरांकडून अधिकाऱ्यांची बैठक
Ganesh Bidkar on Pune Rain – (The Karbhari News Service) – पुणे शहरात दोन दिवसांपूर्वी झालेल्या अतिवृष्टीमुळे अनेक भागांमध्ये पाणी साचण्याच्या घटना घडल्या. त्यामुळे पुणेकरांना मोठा त्रास सहन करावा लागला. या पार्श्वभूमीवर सभागृह नेते गणेश बिडकर यांनी पुणे महापालिकेच्या आपत्ती व्यवस्थापन कक्षात प्रमुख अधिकाऱ्यांची बैठक घेतली. शहरातील पाणी साठणाऱ्या भागांची माहिती संकलित करून संबंधित विभागांना तत्काळ तसेच दीर्घकालीन उपाययोजना राबवण्यासाठी नियोजन करण्याची सूचना यावेळी करण्यात आली. (Pune Heavy Rain)
आज सुट्टीचा दिवस असतानाही महापालिकेचा आपत्ती व्यवस्थापन कक्ष पूर्ण क्षमतेने कार्यरत ठेवण्यात आला आहे. यावेळी सभागृह नेते गणेश बिडकर, मलनिःसारण व देखभाल दुरुस्ती विभाग मुख्य अभियंता जगदीश खानोरे, पथ विभागाचे राजेश बनकर, आपत्ती व्यवस्थापन अधिकारी गणेश सोनूने, नगरसेविका अर्चना जगताप, वृषाली कामठे, पूजा कदम यांच्यासह संबंधित विभागांचे प्रमुख अधिकारी व कर्मचारी उपस्थित होते.
बैठकीत शहरातील पाणी साठणाऱ्या संवेदनशील भागांवर लक्ष केंद्रित करत तात्काळ उपाययोजनांसोबतच भविष्यात अशा परिस्थितीची पुनरावृत्ती होऊ नये, यासाठी दीर्घकालीन नियोजनावर सखोल चर्चा करण्यात आली. विशेषतः ड्रेनेज व्यवस्थेतील त्रुटी दूर करून पावसाच्या पाण्याचा निचरा सुरळीत होईल, यासाठी व्यापक योजना आखण्यावर भर देण्याची सूचना गणेश बिडकर यांनी केली आहे.
—-
“पुणे शहरात अतिवृष्टी झाल्यास कोणत्याही भागात पाणी साचू नये, यासाठी ड्रेनेज व्यवस्थेत आणखीन तात्काळ आणि दीर्घकालीन सुधारणा करणे आवश्यक आहे. यासाठी संबंधित विभागांनी युद्धपातळीवर ॲक्शन प्लॅन बनवण्याची सूचना केली आहे.
– गणेश बिडकर, सभागृह नेते
COMMENTS