PMC Standing Committee | दूषित पाण्याच्या आजारांवर मोफत उपचार आणि घरोघरी मोफत वॉटर प्युरिफायर? नगरसेवक अमोल बालवडकर यांचे दोन प्रस्ताव स्थायी समितीसमोर

PMC Standing Committee | दूषित पाण्याच्या आजारांवर मोफत उपचार आणि घरोघरी मोफत वॉटर प्युरिफायर? नगरसेवक अमोल बालवडकर यांचे दोन प्रस्ताव स्थायी समितीसमोर

Amol Balwadkar NCP – The Karbhari News Service – खडकवासला धरणात दूषित पाणी मिसळत असल्याचा दावा करत, त्याचा फटका पुणेकरांच्या आरोग्याला बसत असल्याचे सांगणारे दोन प्रस्ताव स्थायी समितीसमोर ठेवण्यात आले आहेत. राष्ट्रवादी कॉंग्रेस चे नगरसेवक अमोल बालवडकर यांनी पहिल्या प्रस्तावात  दूषित पाण्यामुळे आजारी पडलेल्या नागरिकांना खासगी रुग्णालयातही मोफत उपचार देऊन त्याचा खर्च पालिकेने करावा, अशी मागणी केली आहे. तर दुसऱ्या प्रस्तावात  शहरातील करदात्यांना पालिकेच्या वतीने मोफत “वॉटर प्युरिफायर” देण्याची मागणी केली आहे. (Pune Khadakwasla Dam)

पत्रात काय म्हटले आहे?

पुणेकरांना सुरक्षित व शुद्ध पाणीपुरवठा करणे ही सार्वजनिक आरोग्याच्या दृष्टीने पालिकेची महत्त्वाची जबाबदारी आहे, असे त्यात नमूद आहे. पुणे शहराला पाणी पुरवणाऱ्या खडकवासला धरणामध्ये दूषित पाणी मोठ्या प्रमाणात मिसळत असल्याचे निदर्शनास आले असून त्याचा थेट परिणाम पुणेकरांच्या पिण्याच्या पाण्यावर आणि आरोग्यावर झाला आहे, असा दावा पत्रात आहे. धरण परिसरात सांडपाणी मिसळण्याचा प्रश्न केवळ त्या परिसरापुरता मर्यादित नसून तो लाखो पुणेकरांच्या आरोग्याशी निगडित असल्याचे बालवडकर यांनी म्हटले आहे.

पत्रांनुसार, जागतिक आरोग्य संघटनेच्या माहितीप्रमाणे दूषित पाण्यामुळे कॉलरा, अतिसार, आमांश, विषमज्वर (टायफॉइड) तसेच हिपॅटायटिस A यांसारख्या आजारांचा प्रसार होऊ शकतो. रासायनिक घटकांमुळेही आरोग्यविषयक धोके निर्माण होऊ शकतात, असेही म्हटले आहे.

प्रस्ताव १ | विशेष आरोग्य सहाय्य योजना

दूषित पाण्याशी संबंधित आजारांवर उपचार करण्यासाठी सामान्य नागरिकांना आर्थिक अडचणींना सामोरे जावे लागत आहे, विशेषतः आर्थिकदृष्ट्या दुर्बल कुटुंबे, लहान मुले, ज्येष्ठ नागरिक आणि जोखमीच्या गटांतील व्यक्तींना याचा अधिक त्रास होत आहे, असे या पत्रात नमूद आहे. आर्थिक कारणांमुळे कोणीही उपचारांपासून वंचित राहू नये, यासाठी पालिकेने विशेष आरोग्य सहाय्य योजना सुरू करावी, अशी मागणी केली आहे.

पालिका हद्दीतील पात्र रुग्णांना दूषित किंवा प्रदूषित पाण्याशी वैद्यकीयदृष्ट्या संबंधित असल्याचे निदान झालेल्या आजारांसाठी पुणे शहरातील कोणत्याही सहभागी शासकीय, महापालिका किंवा खासगी रुग्णालयात मोफत उपचार उपलब्ध करून देण्याची व्यवस्था करावी.
खासगी रुग्णालयातील उपचारांचा खर्च पुणे महानगरपालिकेने अदा करावा.
या प्रस्तावास तत्त्वतः मान्यता देऊन, पालिकेच्या आरोग्य विभागाने आवश्यक आर्थिक तरतूद, कायदेशीर अभिप्राय आणि अंमलबजावणी नियमावली तयार करून पुढील मान्यतेसाठी सादर करण्याचे निर्देश द्यावेत.

प्रस्ताव २  : घरोघरी मोफत वॉटर प्युरिफायर

दुसऱ्या पत्रात आणखी पुढचा मुद्दा मांडण्यात आला आहे. पुणे शहरातील लाखो सामान्य पुणेकर नियमित शुद्ध पाणी मिळावे यासाठी हजारो कोटी रुपये कर पालिकेला भरत आहेत, असे यात म्हटले आहे. दूषित पाण्याने बाधित रुग्णांची आकडेवारीही हजारोंच्या संख्येने वाढत असल्याचा दावा पत्रात आहे.

खडकवासला धरणात मिसळणाऱ्या दूषित पाण्यावर उपाययोजना करण्यासाठी खूप वेळ लागणार असल्याने, तोपर्यंत करदात्यांच्या आरोग्याला असलेला धोका लक्षात घेऊन पालिकेच्या वतीने नामांकित कंपनीचे मोफत “वॉटर प्युरिफायर” देण्यात यावे, अशी मागणी आहे. आरोग्याची काळजी घेणे हे पालिकेचे प्राथमिक कर्तव्य आहे, त्यामुळे तातडीने आर्थिक तरतूद उपलब्ध करून प्रत्येक पुणेकराच्या घरी नामांकित कंपनीचे मोफत प्युरिफायर वितरित करण्यास सुरुवात करावी, असे पत्रात म्हटले आहे.

पुढे काय?

हे दोन्ही विषय स्थायी समितीच्या कार्यक्रमपत्रिकेवर आहेत. समितीने तत्त्वतः मान्यता दिल्यास आरोग्य विभागाला आर्थिक तरतूद, कायदेशीर अभिप्राय आणि अंमलबजावणी नियमावली तयार करण्याचे निर्देश दिले जाऊ शकतात. प्रशासन यावर काय भूमिका घेते आणि समिती निर्णय घेते की विषय पुढे ढकलते, याकडे लक्ष लागले आहे.