PMC Election | BJP | NCP | बहुतांश प्रभागात सत्ताधारी भाजप  विरोधात नाराजी!

बहुतांश प्रभागात सत्ताधारी भाजप  विरोधात नाराजी

: राष्ट्रवादी काँग्रेस पार्टीचे आता प्रभागनिहाय संघटनात्मक बांधणीकडे  लक्ष देण्यास सुरुवात

पुणे : महानगरपालिकेची निवडणूक लांबणीवर गेली असली तरी , राष्ट्रवादी काँग्रेस पार्टीच्या निवडणूकपूर्व घडामोडींना वेग आला आहे. शहरातील बहुतांश प्रभागात सत्ताधारी भाजप भारतीय जनता पार्टी विरोधात असलेली नाराजी  बैठकांमधून जाणवते आहे. त्यामुळेच इच्छुकांची संख्या मोठी असली तरी सर्वजण एक दिलाने काम करतील व येत्या काळात राष्ट्रवादी काँग्रेस पार्टीचा महापौर पुणे महानगरपालिकेत असेल” असा विश्वास शहराध्यक्ष प्रशांतदादा जगताप यांनी व्यक्त केला.

गेल्या दोन वर्षांमध्ये सातत्याने पुणे महानगरपालिकेतील सत्ताधारी भारतीय जनता पार्टीच्या गैरकारभाराविरोधात आवाज उठवणारा प्रमुख पक्ष अशी राष्ट्रवादी काँग्रेस पार्टीची पुणे शहरात ओळख निर्माण झाली आहे. सातत्याने होणारी आंदोलने , फेसबुक लाईव्ह, समाविष्ट गावांमधून येणारे मोर्चे या सर्वांमुळे पुणे शहरात राष्ट्रवादी कांग्रेस पार्टीसाठी चांगले वातावरण निर्माण झाले असतानाच राष्ट्रवादी काँग्रेस पार्टीने आता प्रभागनिहाय संघटनात्मक बांधणीकडे देखील लक्ष देण्यास सुरुवात केली आहे.

“निवडणूक आयोगाने प्रभाग रचना जाहीर केल्यानंतर निवडणुका कधीही झाल्या तरी आदरणीय उपमुख्यमंत्री तथा पुणे जिल्ह्याचे पालकमंत्री ना.अजितदादा पवार यांच्या नेतृत्वाखाली नेत्रदीपक कामगिरी करण्यासाठी राष्ट्रवादी काँग्रेस पार्टी सज्ज आहे”, असे मत राष्ट्रवादी काँग्रेस पार्टीचे शहराध्यक्ष  प्रशांत जगताप यांनी व्यक्त केले आहे. कालपासून शहरातील सर्व प्रभागात राष्ट्रवादी काँग्रेस पार्टीचे शहराध्यक्ष  प्रशांत जगताप यांनी सर्व पदाधिकारी , इच्छुक उमेदवार व कार्यकर्त्यांसमवेत बैठका सुरू केल्या असून शहरातील प्रत्येक प्रभागात राष्ट्रवादी काँग्रेस पार्टीच्या इच्छुकांची मोठी संख्या आहे.

“गेल्या पाच वर्षात सत्ताधारी भारतीय जनता पार्टीला पूर्ण बहुमत असतानादेखील अपेक्षित कामगिरी करता आली नाही, त्यामुळे शहरातील बहुतांश प्रभागात सत्ताधारी भाजप भारतीय जनता पार्टी विरोधात असलेली नाराजी या बैठकांमधून जाणवते आहे. त्यामुळेच इच्छुकांची संख्या मोठी असली तरी सर्वजण एक दिलाने काम करतील व येत्या काळात राष्ट्रवादी काँग्रेस पार्टीचा महापौर पुणे महानगरपालिकेत असेल” असा विश्वास शहराध्यक्ष प्रशांतदादा जगताप यांनी व्यक्त केला. काल कसबा विधानसभा मतदारसंघातील प्रभाग क्रमांक १७,१८,२८,२९ या प्रभागनिहाय बैठका आज संपन्न झाल्या. तर आज शिवाजीनगर विधानसभा मतदारसंघातील १०,११, १२,१५ व १६ या प्रभागातील आढावा बैठक आज संपन्न झाल्या तसेच पुढील काही दिवसात कोथरूड ,पर्वती ,खडकवासला ,हडपसर, पुणे कॅन्टोन्मेंट व वडगांवशेरी या विधानसभा मतदारसंघातील बैठकी देखील संपन्न होणार आहेत.