संतोष वारुळे यांच्याकडील मध्यवर्ती भांडार विभागाची जबाबदारी चेतना केरुरे यांच्याकडे!
पुणे | महापालिका प्रशासनाने उपायुक्त संतोष वारुळे यांच्याकडील मध्यवर्ती भांडार आणि सांस्कृतिक व क्रीडा विभागाची जबाबदारी काढून घेत ती प्रतिनियुक्तीने नुकत्याच आलेल्या चेतना केरुरे यांच्याकडे देण्यात आली आहे. वारुळे यांच्याकडील मध्यवर्ती भांडार चा कार्यभार चार महिन्यापूर्वीच देण्यात आला होता. थोड्याच अवधीत त्यांनी खात्यात शिस्त आणली होती. पारदर्शीपणे कारभार करण्याचा प्रयत्न केला होता. शिवाय सांस्कृतिक आणि क्रीडा खात्याचे काम करताना देखील महापालिकेला चांगले उत्पन्न मिळवून दिले होते. असे असताना त्यांच्याकडील ही दोन्ही खाती काढून घेण्यात आली आहेत. मात्र यामुळे प्रामाणिक काम करणाऱ्या अधिकाऱ्यावर अन्याय होत असल्याची भावना महापालिका वर्तुळातून व्यक्त केली जात आहे. (PMC Pune)
उपायुक्त संतोष वारुळे यांच्याकडे आता परिमंडळ क्रमांक 2, बीओटी सेल, जनरल रेकॉर्ड आणि मुद्रणालय विभागाची जबाबदारी देण्यात आली आहे. तर उपायुक्त चेतना केरुरे यांच्याकडे मध्यवर्ती भांडार, सांस्कृतिक व क्रीडा विभाग आणि निवडणूक विभागाची जबाबदारी देण्यात आली आहे. तसेच उपायुक्त नितीन उदास यांच्याकडेही नवीन जबाबदारी देण्यात आली आहे. उदास यांच्याकडे समाज कल्याण व समाज विकास विभाग तसेच तक्रार निवारण अधिकारी(दिव्यांग) पदाची जबाबदारी देण्यात आली आहे. याबाबतचे आदेश नुकतेच अतिरिक्त आयुक्तांनी जारी केले आहेत. (Pune Municipal Corporation)
