PMC Pune Building | पुणे महापालिका भवन मध्ये ‘तळीराम’ रिचवताहेत ‘कित्येक प्याले’!
| पुणे महापालिका भवन मध्ये आढळला दारूच्या बाटल्यांचा खच!
PMC Pune Building | पुणे : पुणे महापालिकेचा (Pune Municipal Corporation) नावलौकिक देशभर आहे. राज्यातील इतर महापालिका पुणे मनपाचा आदर्श घेत पुढे जाण्याचा प्रयत्न करतात. मात्र पुणे महापालिकेचा दिव्याखाली अंधार असल्याचा दिसून आले आहे. कारण पुणे महापालिकेच्या मुख्य इमारतीमध्येच (PMC Main Building) दारूच्या बाटल्यांचा खच आढळून आला आहे. मनपा भवनात तळीरामांना कुणीतरी आश्रय देत असल्याचं आढळलं आहे. यावर आता पालिका प्रशासन काय कारवाई करणार, याकडे लक्ष लागून राहिले आहे. (PMC Pune)
महापालिका मुख्य तथा जुन्या इमारतीतील पार्किंग मध्ये आणि पूर्वी जिथे महापौरांची गाडी लावली जायची, त्याच्या शेजारीच या दारूच्या बाटल्या आढळून आल्या आहेत. तसेच पालिकेचे वाहन चालक जिथे आपल्या गाड्या पार्क करतात, तिथे त्यांची खोली आहे. त्या ठिकाणी देखील बाटल्यांचा खच आढळून आल्या आहेत. महापालिकेने आपल्या सर्व इमारती खासकरून मुख्य भवन मध्ये आपले सुरक्षा रक्षक तैनात केले आहेत. 24 तास हे रक्षक भवन मध्ये असतात. असे असतानाही महापालिकेत तळीरामांनी तळ ठोकलेला दिसून येतोय. भवन मधेच बाटल्यांचा खच आढळून आला आहे. याबाबत आता महापालिका कुणाला दोषी धरणार? कुणावर कारवाई करणार, हे पाहणे महत्वाचे ठरणार आहे.
—
महापालिकेच्या इमारतीमध्ये अशा पद्धतीने दारूच्या बाटल्यांचा खच आढळून येणे, हे गंभीर आहे. आम्ही याची गंभीर दखल घेतली असून याची पाहणी देखील केली आहे. दोषींवर तात्काळ कारवाई करण्यात येईल.
– राकेश विटकर, मुख्य सुरक्षा अधिकारी
