Voter ID Aadhaar Link | मतदार ओळखपत्र आधार कार्डशी लिंक करावे लागणार | निवडणूक आयोगाचा मोठा निर्णय
Link Voter ID with Aadhaar Card – (The Karbhari News Service) – पॅन कार्डनंतर (PAN Card) आता मतदार ओळखपत्र (Voter ID) आधार कार्डशी (Aadhaar Card) लिंक करण्याचा मोठा निर्णय घेण्यात आला आहे. मंगळवारी मुख्य निवडणूक आयुक्त आणि केंद्रीय गृहसचिवांच्या बैठकीत हा निर्णय घेण्यात आला. मंगळवारी झालेल्या बैठकीत केंद्रीय निवडणूक आयोगाने (Election Commission of India) आधार आणि मतदार ओळखपत्र (EPIC) लिंक करण्यास परवानगी दिली आहे. या संदर्भात निवडणूक आयोगाने एका निवेदनात म्हटले की, संविधानाच्या कलम 326 आणि लोकप्रतिनिधी कायद्याच्या कलम 23(4), 23(5) आणि 23(6) नुसार EPIC आधारशी जोडले जाईल. यापूर्वी सरकारने पॅन कार्ड आधारशी लिंक करण्याचा निर्णय घेतला होता.
निवडणूक आयोग लोकप्रतिनिधी कायदा 1950 च्या कलम 326 आणि सर्वोच्च न्यायालयाच्या संबंधित निर्णयांनुसार EPIC ला आधारशी जोडण्यासाठी पावले उचलेल असे निवेदनात म्हटले आहे. मुख्य निवडणूक आयुक्त ज्ञानेश कुमार यांच्या अध्यक्षेतीखाले आज निर्वाचन सदन येथे निवडणूक आयुक्त डॉ. सुखबीर सिंग संधू आणि डॉ. विवेक जोशी यांच्यासह केंद्रीय गृह सचिव-सचिव, कायदे विभाग, सचिव एमईआयटीवाय आणि सीईओ यूआयडीएआय आणि निवडणूक आयोगाच्या तांत्रिक तज्ञांसह बैठक पार पडली. याच बैठकीत हा महत्त्वाचा निर्णय घेण्यात आला. युनिक आयडेंटिफिकेशन अथॉरिटी ऑफ इंडिया आणि निवडणूक आयोगाचे तांत्रिक तज्ञ लवकरच या संदर्भात पुढील चर्चा करतील.
विरोधकांच्या आरोपानंतर बोलावण्यात आली बैठक
नुकत्याच झालेल्या लोकसभा आणि काही विधानसभा निवडणुकीत विरोधकांकडून बोगस मतदानाचा आरोप केला गेला. तसेच डुप्लिकेट व्होटर कार्ड (EPIC) क्रमांकावरून संसदेत आणि बाहेर बराच गदारोळ सुरू आहे. याच मुद्द्यावरून राजकीय पक्षांनी निवडणूक आयोगाच्याच वैधतेवर प्रश्न उपस्थित केले आहेत. काँग्रेस नेते राहुल गांधी यांनीही हा मुद्दा उपस्थित केला होता. दरम्यान निवडणूक आयोगाने (EC) गेल्या शुक्रवारी डुप्लिकेट मतदार ओळखपत्र (EPIC) क्रमांकांची समस्या येत्या तीन महिन्यांत सोडवणार असल्याचे म्हटले होते. यानंतर मुख्य निवडणूक आयुक्तांनी मतदार ओळखपत्र आधारशी लिंक करण्याबाबत चर्चा करण्यासाठी बैठक बोलावली होती. या बैठकी दोन्ही दस्तावेज एकमेकांशी लिंक करण्यास मंजुरी देण्यात आली आहे.
निवडणूक प्रक्रिया अधिक पारदर्शक होईल
EPIC शी Aadhaar लिंक करण्यामागील मुख्य उद्देश मतदार यादीतील अनियमितता दूर करणे आणि ती अधिक सुरळीत करणे हा आहे. या निर्णयामुळे बनावट मतदार ओळखण्यास मदत होईल, असा विश्वास निवडणूक आयोगाकडून व्यक्त करण्यात येत आहे. मतदार ओळखपत्राशी आधार लिंक करण्यामागील आणखी एक कारण म्हणजे बनावट मतदानाला आळा घालण्यात मदत होऊ शकते. ही प्रणाली लागू झाल्यानंतर एका व्यक्तीने अनेक ठिकाणी मतदान करण्याची शक्यता नाहीशी होईल आणि निवडणूक प्रक्रिया अधिक पारदर्शक होईल.
COMMENTS