राजकीय गुन्हे सरसकट माफ करावे, ही शहर काँग्रेसची अधिकृत भूमिका नाही | शहराध्यक्ष अरविंद शिंदे यांचे स्पष्टीकरण
शहरातील सामाजिक, राजकीय आंदोलनात कार्यकर्त्यांवर दाखल झालेले राजकीय गुन्हे सरसकट मागे घेण्याची मागणी कॉंग्रेस पक्षाच्या काही कार्यकर्ते, नेते यांनी नुकतीच पुण्याचे नवनियुक्त पोलीस आयुक्त यांच्याकडे केली आहे. मात्र याबाबत काँग्रेस शहर अध्यक्ष अरविंद शिंदे यांनी आक्षेप घेतला नाही. सरसकट गुन्हे माफ करण्याची भूमिका ही एका गटाची आहे. ती शहर काँग्रेसची भूमिका नाही. असे शिंदे यांनी प्रसिद्धीस दिलेल्या निवेदनात म्हटले आहे. यामुळे मात्र काँग्रेस मधील अंतर्गत वाद चव्हाट्यावर आला आहे.
सामाजिक, राजकीय आंदोलनात कार्यकर्त्यांवर दाखल झालेले राजकीय गुन्हे मागे घेण्याची मागणी काँग्रेसच्या एका गटाकडून पुण्याचे नवनियुक्त पोलिस आयुक्त रितेश कुमार यांच्याकडे करण्यात आली होती. यावेळी प्रदेश कॉँग्रेसचे उपाध्यक्ष, माजी आमदार मोहनदादा जोशी, माजी राज्यमंत्री रमेशदादा बागवे , संजय बालगुडे, विरेन्द्र किराड, नगरसेवक रवींद्र धंगेकर, नगरसेवक अविनाश बागवे, रमेश अय्यर आदी उपस्थित होते. मात्र यावर शहर अध्यक्ष शिंदे यांनी तीव्र आक्षेप घेत ही फक्त एका गटाची भूमिका असून शहर काँग्रेस ची भूमिका नाही, असे म्हटले आहे.
राजकीय समजून माफी देण्याची त्यांनी मागणी अनावधानाने केली असावी. करोना काळात सर्वसामान्य नागरिकांवर दाखल झालेले गुन्हे तातडीने माफ करण्यात यावेत या मागणीस आमचा ठाम पाठिंबा आहे मात्र राजकीय सामाजिक कार्यकर्त्यांवर दाखल झालेले गुन्हे राज्य शासनामार्फत शासन निर्णय (जीआर) प्रमाणे परिमंडळ उपायुक्तांमार्फत समिती गठीत करून आयुक्त स्तरावर गुन्ह्याची व्याप्ती पडताळणी करण्यात यावी. अशी आमची अधिकृत मागणी आहे. गुन्हेगारी वर्तनाला राजकीय गुन्हा संबोधित करून अप्रत्यक्ष संरक्षण देण्याचा घातक प्रघात पुणे पोलीसांनी पाडू नये. राज्य सरकारने या संदर्भात आदेश दिले असून पुणे पोलिसांनी राजकीय,
सामाजिक गुन्ह्यांची पारदर्शक निःपक्षपाती पडताळणी करून योग्य कारवाई करावी अशी आमची मागणी व पुणे शहर काँग्रेस कमिटीची अधिकृत भूमिका आहे. या पूर्वी काँग्रेसच्या काही गटांनी दिलेले निवेदन हे पक्षाची अधिकृत भूमिका नाही.
