PMC Mock Drill | पुणे महापालिकेच्या मुख्य इमारतीत बॉम्बस्फोटसदृश आवाज अन् आग; मॉक ड्रिलद्वारे आपत्ती व्यवस्थापनाची चाचणी
|चार कर्मचारी-अधिकाऱ्यांची फायरमन लिफ्टने सुटका; अतिरिक्त आयुक्त प्रजित नायर यांच्यासह गच्चीवरील नागरिकांना सुरक्षित बाहेर काढले
Pune PMC News – The Karbhari News Service – आपत्कालीन परिस्थितीत प्रशासनाची सज्जता किती प्रभावी आहे, याची चाचणी घेण्यासाठी पुणे महानगरपालिकेच्या मुख्य इमारतीत बॉम्बस्फोटसदृश आवाज होऊन आग लागल्याची काल्पनिक परिस्थिती निर्माण करण्यात आली. जागतिक आपत्ती जोखीम न्यूनीकरण दिनानिमित्त १३ ऑक्टोबर रोजी सायंकाळी ३ वाजून ५५ मिनिटांनी हे मॉक ड्रिल आयोजित करण्यात आले होते. या सरावात अग्निशमन दलाने अवघ्या १५ मिनिटांत आगीवर नियंत्रण मिळवले, तर इमारतीत अडकलेल्या अधिकारी, कर्मचारी आणि नागरिकांना सुरक्षित बाहेर काढण्याची मोहीम राबवण्यात आली. (PMC Fire Department)
बॉम्बस्फोटसदृश आवाजाची सूचना; अग्निशमन दल तातडीने रवाना
महापालिकेच्या मुख्य इमारतीत बॉम्बस्फोटसदृश आवाज होऊन आग लागल्याची सूचना अग्निशमन दलाच्या नियंत्रण कक्षाला मिळाली. घटनेचे गांभीर्य लक्षात घेऊन कसबा आणि एरंडवणा अग्निशमन केंद्रांमधून वाहने रवाना करण्यात आली. त्यानंतर अग्निशमन मुख्यालयातील उंच शिडीचे वाहन आणि रेस्क्यू व्हॅन, तसेच नायडू आणि जनता वसाहत येथील अग्निशमन वाहनेही घटनास्थळी पाठवण्यात आली.
या घटनेची माहिती मिळताच महापालिकेच्या सुरक्षा विभागाने संपूर्ण इमारतीतील अधिकारी, कर्मचारी आणि नागरिकांना सुरक्षितपणे बाहेर काढून इमारत रिकामी केली.
PMC मध्ये आपत्ती व्यवस्थापनाचा सराव
अग्निशमन दलाची तत्परता; अडकलेल्यांची सुटका
दुसऱ्या मजल्यावर अडकलेल्या कर्मचाऱ्यांची सुटका
अग्निशमन जवान घटनास्थळी पोहोचले, तेव्हा इमारतीच्या दुसऱ्या मजल्यावर आग लागल्याचे आणि काही अधिकारी-कर्मचारी अडकल्याचे निदर्शनास आले. जवानांनी इमारतीच्या चारही बाजूंना अग्निशमन वाहने तैनात करून पाण्याचा मारा सुरू केला. त्याचवेळी फायरमन लिफ्टच्या साहाय्याने दुसऱ्या मजल्यावर अडकलेल्या चार कर्मचारी-अधिकाऱ्यांना खाली उतरवण्यात आले. त्यानंतर त्यांना रुग्णवाहिकेतून रुग्णालयात रवाना करण्यात आले.
दरम्यान, सुरक्षिततेच्या दृष्टीने इमारतीच्या गच्चीवर गेलेले अतिरिक्त महापालिका आयुक्त प्रजित नायर, इतर अधिकारी आणि नागरिक यांची उंच शिडीच्या मदतीने सुखरूप सुटका करण्यात आली. अग्निशमन दलाच्या जवानांनी अन्य पाच जखमी व्यक्तींनाही बाहेर काढले. या संपूर्ण प्रक्रियेदरम्यान इमारत रिकामी करण्यात आली.
अत्याधुनिक उपकरणांचा वापर; आगीवर १५ मिनिटांत नियंत्रण
आगीवर नियंत्रण मिळवण्यासाठी अग्निशमन दलाने शॉर्ट, टर्बो जेट, पीकॉक, रिव्हॉल्व्हिंग, मॉनिटर आणि होज पाइप अशा विविध प्रकारच्या उपकरणांचा वापर केला. घटनास्थळी अग्निशमन वाहनांचे आगमन झाल्यानंतर सुमारे १५ मिनिटांत आगीवर नियंत्रण मिळवण्यात यश आले.
यानंतर शिवाजीनगर पोलीस ठाण्याचे बॉम्बशोधक व नाशक पथक (BDDS) आणि स्थानिक पोलीस पथकाने श्वानपथकाच्या मदतीने संपूर्ण इमारतीची तपासणी केली.
जागतिक आपत्ती जोखीम न्यूनीकरण दिनानिमित्त सराव
दरवर्षी १३ ऑक्टोबर रोजी जागतिक आपत्ती जोखीम न्यूनीकरण दिन साजरा केला जातो. त्यानिमित्त आयोजित या मॉक ड्रिलमधून आपत्कालीन परिस्थितीत विविध विभागांमध्ये समन्वय, बचावकार्याची गती आणि उपलब्ध यंत्रणांची सज्जता तपासण्यात आली.
मॉक ड्रिल पूर्ण झाल्यानंतर अतिरिक्त महापालिका आयुक्त प्रजित नायर यांनी अग्निशमन अधिकारी, जवान आणि शिवाजीनगर पोलीस ठाण्याच्या पथकाचे कौतुक केले. अशा सरावातून नेमक्या अडचणी आणि त्रुटी लक्षात येतात. त्यानुसार आवश्यक उपाययोजनांवर कार्यवाही करणे शक्य होते, असे त्यांनी नमूद केले.
मुख्य अग्निशमन अधिकारी गणेश सोनुने यांनीही आपत्कालीन परिस्थितीचा सामना करण्यासाठी सर्व विभागांनी परस्पर समन्वय राखून तातडीने कार्यवाही केल्याचे सांगितले. या मोहिमेत अग्निशमन दल, पोलीस विभाग, BDDS, सुरक्षा विभाग, आपत्ती व्यवस्थापन विभाग, आरोग्य विभाग आणि विद्युत विभागाने सहभाग घेतला.
या सरावामुळे आपत्कालीन परिस्थितीत जीवितहानी टाळण्यासाठी तातडीने प्रतिसाद देणे, इमारत रिकामी करणे आणि विविध यंत्रणांमध्ये समन्वय राखणे किती महत्त्वाचे आहे, हे अधोरेखित झाले.
COMMENTS