Bhavani Peth Palkhi | भवानी पेठ पालखी मुक्काम स्थळाच्या सोयी-सुविधांची पाहणी संपन्न; प्रशासकीय सज्जतेवर भर
Pune Breaking News – (The Karbhari News Service) – भवानी पेठ येथील पालखी मुक्काम स्थळाची आज प्रशासकीय पातळीवर सविस्तर पाहणी करण्यात आली. आषाढी वारी दरम्यान पुण्यात विसावणाऱ्या पालखी सोहळ्यासाठी येणाऱ्या भाविकांना अधिकाधिक दर्जेदार सोयी-सुविधा उपलब्ध करून देण्याच्या उद्देशाने विविध विभागांच्या कामांचा आढावा घेण्यात आला. (PMC Pune)
पाणी व स्वच्छता: मुक्काम स्थळी स्वच्छ पिण्याच्या पाण्याची योग्य व्यवस्था राहील याची खात्री करण्यात आली. तसेच फिरत्या शौचालयांसाठी नियोजित जागांची पाहणी करून स्वच्छता व सुशोभीकरणाबाबत संबंधित विभागांना स्पष्ट सूचना देण्यात आल्या.
रस्ते दुरुस्ती: पालखी मार्गावरील तसेच मुक्काम स्थळ परिसरातील रस्त्यांची तातडीने दुरुस्ती व डागडुजी करून प्रवास अधिक सुरक्षित व सुलभ करण्याचे निर्देश देण्यात आले.
विद्युत व्यवस्था: रस्त्यात अडथळा निर्माण करणारे दिव्यांचे खांब त्वरित हलवण्याच्या सूचना देण्यात आल्या. तसेच भाविकांच्या सुरक्षेच्या दृष्टीने सीसीटीव्ही यंत्रणा बसवण्याचे आदेश देण्यात आले.
आरोग्य सुविधा: वारी कालावधीत २४ तास कार्यरत राहणाऱ्या आरोग्य पथकांसाठी योग्य जागेची निश्चिती करण्यात आली असून आवश्यक वैद्यकीय सुविधा सज्ज ठेवण्याचे निर्देश देण्यात आले.
या पाहणीचा मुख्य उद्देश विद्यमान सोयी-सुविधांची गुणवत्ता तपासून तांत्रिक त्रुटी दूर करणे हा होता. पालखी सोहळा हा भाविकांच्या श्रद्धेचा केंद्रबिंदू असल्याने मुक्काम स्थळी उत्कृष्ट व शिस्तबद्ध व्यवस्था निर्माण करण्यावर प्रशासनाचा विशेष भर आहे. सर्व सुविधा नियोजित पद्धतीने अधिक सक्षम करण्यासाठी संबंधित विभागांना समन्वयाने काम करण्याचे आदेश देण्यात आले असून भाविकांना कोणताही त्रास होणार नाही याची दक्षता घेण्यात येणार आहे.
याप्रसंगी महापौर मंजुषाताई नागपुरे यांच्या समवेत आमदार हेमंत रासने, स्थायी समिती अध्यक्ष श्रीनाथ भिमाले, महापालिका आयुक्त नवल किशोर राम, अतिरिक्त महापालिका आयुक्त प्रजित नायर, नगरसेवक विशाल धनवडे, नगरसेविका पल्लवीताई जावळे, स्वीकृत नगरसेवक राजेंद्र काकडे, मंदिराचे विश्वस्त गोरख भिकुले, प्रमोद भेंगरूट, भारतीय वारकरी मंडळाचे अध्यक्ष धनंजय बडदे, पावसकर (सीटीई) तसेच इतर संबंधित अधिकारी उपस्थित होते.
COMMENTS